إنت تركّز على خدمتك، وإحنا نتكفّلوا بحضورك الرقمي
باش يكون عندك حضور مهني، متناسق، ويجيب نتيجة، من غير ما تضيع وقتك كل أسبوع في التفكير: شنوّة ننشر؟ شنوّة نصوّر؟ وشنوّة نروّج؟
من الاستراتيجية، للتصوير، للنشر، للحملات الإعلانية وتحليل النتائج، نتكفّلوا بإدارة حضورك الرقمي من البداية للنهاية.
المحتوى والإعلانات لازم يخدموا مع بعضهم
المحتوى يبني الثقة، والإعلانات تساعدك توصل لناس جدد وتجيب طلبات. أما كي كل واحد فيهم يخدم وحده، النتيجة تبقى محدودة: المحتوى وحده ينجم يجيب تفاعل ووصول أما النمو يكون أبطأ، والإعلانات وحدها تنجم تجيب زيارات، أما إذا الحساب والمحتوى ما يبنيوش ثقة، الحريف يشوف الإعلان ويخرج.
لهذا نخدموا عليهم كاستراتيجية واحدة: المحتوى يفسّر، يقنع ويبني الثقة، والإعلانات توصّل المحتوى والعرض للناس المناسبة.
الهدف موش إننا « نعملوا منشورات »
الهدف إنو الحضور الرقمي يساهم في طلبات، مواعيد، حجوزات ومبيعات.
شنوّة نتكفّلوا بيه كل شهر؟
-
01
استراتيجية العلامة والمحتوى
قبل ما نبدأوا في النشر، نحدّدوا شكون الجمهور اللي تحب توصله، شنوّة أهداف المشروع، شنوّة الرسائل الأساسية، شنوّة أنواع المحتوى اللي تخدم معاك، وشنوّة المواضيع اللي تهم الحريف فعلًا.
وبعد نبنيو رزنامة محتوى شهرية تخدم أهداف المشروع، موش رزنامة معمّرة باش نقولوا نشرنا.
-
02
تصوير وإنتاج المحتوى
نتكفّلوا حسب الخطة بالفيديوهات القصيرة، الصور المهنية، المنشورات، القصص، المحتوى المتسلسل وتحضير المحتوى البصري المتناسق مع هوية مشروعك.
التصوير ما يكونش عشوائي: كل فيديو أو صورة يكون عندهم دور داخل الاستراتيجية.
-
03
تنظيم وتحسين حضورك على مواقع التواصل
قبل حتى ما الشخص يشوف آخر منشور، يشوف حسابك. لهذا نراجعوا ونحسّنوا الوصف، الصورة، طريقة تقديم النشاط، وسائل التواصل، الأزرار، الرابط، القصص المثبّتة والمعلومات اللي يحتاجها الحريف باش يفهم الخدمة ويتواصل بسهولة.
الهدف إنو حسابك ما يكونش مجرد واجهة جميلة: يكون مسار واضح من أول زيارة إلى التواصل معاك.
-
04
إدارة الحملات الإعلانية على ميتا وتيك توك
إذا الإعلانات جزء من الاستراتيجية، نتكفّلوا بتحديد الجمهور، بناء الحملات، كتابة الإعلانات، إعداد الصور والفيديوهات الإعلانية، اختبار أكثر من نسخة، متابعة النتائج وتحسين الحملات حسب الأداء.
ما نخليوش الإعلان يخدم وحده بنفس الإعدادات شهر كامل: نراقبوا الأرقام ونعدّلوا حسب شنوّة قاعد يصير فعلاً.
-
05
متابعة ما يتغيّر في المنصات
مواقع التواصل الاجتماعي تتبدّل بسرعة: نوع فيديو كان يخدم العام اللي فات ينجم اليوم ما عادش يعطي نفس النتيجة. لهذا نتابعوا أنواع المحتوى الجديدة، الأصوات المنتشرة، طرق التصوير، أشكال الفيديوهات، تغيّرات المنصات وسلوك الجمهور.
موش كل صيحة لازم تركب عليها: نختاروا اللي يخدم العلامة والهدف متاعك.
-
06
تقرير شهري واضح
في آخر كل شهر، تعرف بالضبط وين وصلت. نتابعوا حسب الهدف: الوصول، المشاهدات، التفاعل، النقرات، طلبات التواصل، العملاء المحتملين، الحجوزات، المبيعات وأداء الحملات الإعلانية.
ما نعطيكش أرقام من غير معنى: نفسّروا شنوّة خدم، شنوّة ما خدمش، وشنوّة باش نبدّلوا الشهر الجاي. وبين الاجتماعات، يبقى التواصل مفتوح عبر واتساب للمتابعة اللازمة.
التصوير يصير عندك وبمعدات مهنية
المحتوى المهني ما يحتاجش دائمًا استوديو كبير، لكن يحتاج ضوء صحيح، صوت واضح، كادر مدروس وصورة تحترم مستوى العلامة. فريقنا يتنقّل إلى مقرّك بالمعدات اللازمة، ومنها حسب نوع التصوير:
باش الصورة تكون واضحة مهما كان ضوء المكان.
الصوت هو أول حاجة تخلي المشاهد يوقف ولا يكمّل.
ونحضّروا المكان والتصوير قبل ما نبدأوا.
الهدف موش إنو الفيديو يبان « إعلان مصطنع ». الهدف إنو يكون مهني، طبيعي، ويشدّ المشاهد للآخر. إنت ما يلزمكش تكون خبير تصوير: إنت تعرف خدمتك، وإحنا نعرفوا كيفاش نحوّلوها إلى محتوى.
لمن الخدمة هاذي؟
الخدمة مناسبة للعلامات التجارية، المحلات والشركات اللي تحب تفوّض حضورها الرقمي لفريق كامل وتركّز على نشاطها الأساسي. نخدم خصوصًا مع مجالات كيف المطاعم، الجمال والعناية، المحلات والتجارة، الخدمات، الصحة، المشاريع المحلية، والعلامات اللي تحتاج حضور شهري مستمر على مواقع التواصل الاجتماعي.
إذا كل شهر تلقى روحك لازم تخمّم في المحتوى، التصوير، النشر، الإعلانات والأرقام، يمكن الوقت جاء باش تفوّض المنظومة كاملة بدل ما تواصل تدير كل جزء وحده.
قدّاش يلزم وقت باش نشوفوا نتيجة؟
في العادة، ننصح بمدة لا تقل عن 3 أشهر. علاش؟ خاطر أول شهر موش كان نشر: يلزمنا نفهموا الجمهور، نبنيو النظام، نجرّبوا المحتوى، نجمعوا أرقام، نطلقوا الحملات إذا لازمة، وبعد نبدأوا نحسّنوا حسب النتائج.
التسويق الرقمي ما يتقاسش بمنشور ولا بحملة واحدة: يلزمو وقت كافي باش نقروا الأرقام ونشوفوا الاتجاه الحقيقي.
تفوّض الخدمة ولا تتعلّم تعملها وحدك؟
الخدمة هاذي معمولة للي يحب فريق يتكفّل بالاتصال الرقمي متاع المشروع. أما إذا إنت تحب تتعلّم الطريقة وتبني المحتوى بنفسك، تنجم تختار تكوين صناعة المحتوى أو برنامج المرافقة. وإذا نشاطك مبني على اسمك وخبرتك الشخصية وتحتاج خدمة أعمق على صورتك المهنية، تنجم تشوف بناء العلامة الشخصية للمستشارين والخبراء. وإذا مازلت موش عارف شنوّة الحل الأنسب، تبدأ بـاستشارة في التسويق الرقمي باش نحلّلوا وضعك ونحدّدوا الاتجاه الصحيح.
الأسئلة اللي تتعاود أكثر
شنوّة الفرق بين الإدارة الشاملة وتكوين في مواقع التواصل الاجتماعي؟
في التكوين، إنت تتعلّم كيفاش تخطّط، تصنع المحتوى، تنشر وتدير حضورك بنفسك. أما في الإدارة الشاملة، إحنا نتكفّلوا بالتنفيذ الشهري حسب الاتفاق: استراتيجية، محتوى، تصوير، نشر، حملات ومتابعة. إذا هدفك الاستقلالية اختار التكوين أو المرافقة، وإذا هدفك تفوّض الخدمة، الإدارة الشاملة هي الأنسب.
هل ميزانية الإعلانات داخلة في السعر؟
ميزانية الإعلانات نفسها تكون منفصلة عن أتعاب إدارة الخدمة. يعني المبلغ اللي يتدفع للمنصة الإعلانية يتحدّد حسب أهداف المشروع وحجم الجمهور والحملة المقترحة. قبل الإطلاق، يكون عندك وضوح على الميزانية الموصى بها وكيفاش باش تتصرف.
هل فما مدة التزام؟
ننصح عادة بالتعاون لمدة 3 أشهر على الأقل حتى يكون عنا وقت كافي لبناء المحتوى، اختبار الحملات، جمع البيانات وتحسين النتائج. التفاصيل النهائية تتحدّد في العرض حسب طبيعة المشروع والخدمة المطلوبة.
شكون يصوّر الفيديوهات والصور؟
فريقنا يتكفّل بالتحضير والتصوير وإنتاج المحتوى. وحسب الخطة، نجيوا لمقرّك بالمعدات المهنية ونحضّروا الفيديوهات والصور اللازمة للشهر.
تخدموا مع شركات خارج تونس؟
المراحل الاستراتيجية، إدارة المحتوى والحملات تنجم تتم عن بعد. أما التصوير الميداني يعتمد على مكان المشروع وإمكانية تنظيم الإنتاج. بعد ما نفهموا حاجتك وموقعك، نحدّدوا شنوّة ينجم يتعمل عن بعد وشنوّة يحتاج حضور.
اطلب عرض لإدارة حضورك الرقمي
احكيلي على مشروعك والحسابات اللي تستعملها توا. بعد ما نراجع الوضع، نرجعلك باقتراح خدمة وتكلفة شهرية حسب احتياجاتك.
الحقول اللي فيها * إجبارية.
نبدأوا أولًا باللي عندك توا
قبل ما نقترحوا محتوى جديد أو حملة جديدة، نشوفوا حضورك الحالي: شنوّة قاعد يخدم؟ وين قاعدة تضيع وقت ومجهود؟ شنوّة ناقص؟ وشنوّة تنجم تبدّل باش حضورك الرقمي يبدأ يساهم أكثر في النتائج التجارية؟